Dóńt serbskeje Židowki Hany Šěrcec z Hórkow zaběra Hórčana Jurja Kocha hižo přez lětdźesatki. Započatk šěsćdźesatych lět je wo Hanje swoje prěnje powědančko napisał a spočatk swojich wosomdźesatych lět rozsudźi so stawiznu znowa powědać – němsce. Awtorej na tym njezaleži, we wšěm historisce korektny być, jeho Hana je literarna figura, powědka wobchadźa z faktami jara swobodnje. Kniha wotzamknje so z dosłowom Hermanna Simona, kotryž na to skedźbni, zo kniha njech tomu přinošuje, zo so na wosud Hany Šěrcec njezabudźe. Tute připóznaće bě Kochej bytostny nastork, stawiznu nětko tež serbsce znowa powědać.